ශ්‍රී ලංකාවේ ගුවන් සේවා ඉතිහාසය–Aviation History of Sri Lanka– V කොටස

මෙම ලිපියේ හතරවන කොටස මින් පෙර පළවී ඇත

1957

1957 නොවැම්බර් 01 වන දින එක්සත් රාජධානිය විසින් කටුනායක ගුවන් තොටුපල ලංකාවට භාරදෙනු ලැබූ අතර 1959 දී කටුනායක ගුවන් තොටුපලේ සිට ජාත්‍යන්තර ගුවන් ගමන් ආරම්භ කරනු ලැබිණ.

කටුනායක ගුවන් තොටුපළ 1957/58 වර්ෂ වලදී

1960

1960 වර්ෂයේ දී ලංකාවේ පළමු දේශීය පෞද්ගලික ගුවන් සමාගම වන “උපාලි එයාර්“ අරඹන ලදී.

1961

1961 වර්ෂයේ දී අනුරාධපුරයට ගුවන් ගමන් පවත්වා ගනිමින් දේශීය ගුවන් ගමන් ආරම්භ කරන ලද බවට තොරතුරු සඳහන් වන අතර පසුව ගල් ඔය (අම්පාර), මඩකලපුව, ත්‍රිකුණාමලය ආදී ස්ථාන වලට මෙය ව්‍යාප්ත විය.

1963

1963 වර්ෂයේදී කටුනායක ගුවන් තොටුපලේ සංවර්ධන කටයුතු ආරම්භ කරන ලදී. රාජකීය ගුවන් හමුදාව සතුව තිබූ මීටර් 1840 ක් වූ කටුනායක ගුවන් ධාවන පථය මීටර් 3350 ක් දක්වා දිගු කරනු ලැබූ අතර ඒ කැනේඩියානු ආධාර යටතේයි. මේ අවස්ථාවේදී පර්යන්ත ගොඩනැගිල්ල වර්ෂයකට මගීන් 150000 ක් මෙහෙය වීම සඳහා ඉඩකඩ ඇතිව සකස් කරනු ලැබිණ. අදටත් මීගමුව කොළඹ මාර්ගයෙන් ගුවන් තොටුපළට පිවිසෙන මාර්ගය කැනඩා මිත්‍රත්ව මාර්ගය ලෙස හඳුන්වන්නෙ මේ නිසාය.

මේ අතර 1962 වර්ෂයේ දී “කේ. එල්. එම්.“ ගුවන් සමාගම සමග “එයාර් සිලෝන්“ සමාගම තිබූ ගිවිසුම අවලංගු වූ අතර “එයාර් සිලෝන්“ සමාගම බ්‍රිතාන්‍යයේ “බී. ඒ. ඕ. සී“ (BOAC – British Overseas Airways Corporation) සමග ගිවිසුමට එළඹිණ. “බී. ඕ. ඒ. සී.“ ගුවන් සමාගම පසුව “බ්‍රිටිෂ් එයාර්වේස්“ නමින් වෙනස් විය.

1968

1968 නොවැම්බර් 15 වන දින කටුනායක ගුවන් තොටුපලේ සිට ජාත්‍යන්තර ගුවන් ගමන් ආරම්භ කරන ලද අතර එම වර්ෂයේම කටුනායක ගුවන් තොටුපලේ පර්යන්ත ගොඩනැගිල්ල තව දුරටත් විශාල කිරීමත් “ඒප්‍රනය“ සහ “ටැක්සි“ මාර්ග සකස් කිරීමත් සිදු කරනු ලැබීය. මේ අවස්ථාව වන විට ක්‍රමයෙන් ගුවන් ගමන් වැඩි වෙමින් තිබූ අවධියක් වූ අතර ශ්‍රී ලංකාවේ ගුවන් සේවා ක්ෂේත්‍රය ද වඩ වඩාත් ව්‍යාප්ත වෙමින් පැවතිණ. 1971 සැප්තැම්බර් 09 වන දින තවත් සුවිශේෂි සිදුවීමක් ලෙස සනිටුහන් වනුයේ එවකට ඉතා ඉහළ පිළිගැනීමක් තිබූ “කොන්ඩෝර්“ ගුවන් සමාගමට අයිති “බෝයිං 747“ වර්ගයේ “ජම්බෝ ජෙට්“ ගුවන් යානාවක් ශ්‍රී ලංකාවට පැමිණීමයි. එය එවකට ලොව තිබූ විශාලම ගුවන් යානය වූ අතර එම යානා භාවිතා කළ මුල්ම ගුවන් සමාගම වූයේ “කොන්ඩෝර්“ සමාගමයි.

කොන්ඩෝර් සමාගමේ බෝයිං 747 වර්ගයේ යානයක්

1972

1972 වර්ෂයේදී ශ්‍රී ලංකාව ජනරජයක් වූ අතර “බී.ඕ. ඒ. සී.“ සමාගම සමග තිබූ ගිවිසුම අවලංගු විය. නමුත් ඒ වන විටත් එනම් 1971 දීම “එයාර් සිලෝන්“ සමාගම එහි 4 වන සහකරු ලෙස Union de Transports Aériens (UTA) සමග ගිවිසුමට එළඹී තිබිණ.

1972

ශ්‍රී ලංකා ගුවන් හමුදාව විසින් 1972 වසරේ දී “හෙලිටුවර්ස්“ නමින් සමාගම් ලියාපදිංචි කර සංචාරක කර්මාන්තය වැඩි දියුණු කිරීමේ අරමුනින් දේශීය ගුවන් ගමන් සිදු කරන ලදී. පසු කාලීනව මාලදිවයික දක්වාද ඔවුන්ගේ මෙහෙයුම් සිදු කරනු ලැබීය. හෙලි ටුවර්ස් ආයතනය පිහිටුවීම සඳහා මූලිකත්වය ගෙන කටයුතු කරනු ලැබූවේ එයාර් චීෆ් මාෂල් පද්මන් මෙන්ඩිස් මහතා විසිනි.

1974

1974 වර්ෂය ශ්‍රී ලාංකීය ගුවන් ක්ෂේත්‍රයේ එදා මෙදා තුර සිදුවී අති දැවැන්තම ඛේදවාචකය සිදු වූ වසරක් ලෙස ඉතිහාසයේ සනිටුහන් වී ඇත. ඉන්දුනීසියාවේ සුරබායා ගුවන් තොටුපලේ සිට ශ්‍රී ලංකාව හරහා මක්කම වෙත ගමන් කරමින් තිබූ ඩී.සී. 8 වර්ගයේ යානාවක් මස්කෙළිය නෝර්ටන්බ්‍රිජ් හි පිහිටි සප්ත කන්‍යා කඳුවැටියේ ගැටීම නිසා සම්පූර්ණයෙන්ම විනාශයට පත්ව එහි ගමන් කළ කාර්ය මණ්ඩලය හා මගීන් සියළු දෙනා මරණයට පත්විය. මෙම අනතුර සිදු වූයේ 1974 වර්ෂයේ දෙසැම්බර් 4 වන දින දීය. (මේ සම්බන්ධ ලිපියක් පසුගිය මෙහි පලවිය)

අනතුරට පෙර ගත් ඡායාරූපයක්

ශබ්ධයේ වේගය මෙන් දෙගුණයකින් පියාසර කල හැකි ගුවන් යානයක් වූ “කොන්කෝඩ්“ ගුවන් යානයක් ප්‍රථම වතාවට 1976 වර්ෂයේ ශ්‍රී ලංකාවට පැමිණි අතර දැනට “කොන්කෝඩ්“ ගුවන්යානා සේවයේ යෙදෙන්නේ නැත. එවකට සුපිරි තාක්ෂණයකින් යුතු ගුවන් යානාවක් ලෙස මෙය හඳුන්වනු ලැබූ අතර “බ්‍රිටිෂ් එයාර්වේස්“ ගුවන් සමාගමට අයත් එකකි.

1976

1976 දී නොබැඳි ජාතීන්ගේ සමුළුව වෙනුවෙන් කටුනායක ගුවන් තොටුපලේ ප්‍රාථමික රේඩාර් පද්ධතියක් සවිකරන ලදී.

1977

1977 වර්ෂයේදී “ඇලෝයි හර්ස්මන්“ නැමැත්තෙකු විසින් ගාලු මුව දොර පිටියේදී පැරෂුට් සන්දර්ශණයක් පැවැත්වූ අතර එය එවකට ශ්‍රී ලංකා වාසීන්ට නැවුම් අත්දැකීමක් විය.

1978

1978 වර්ෂයේ සැප්තැම්බර් 7 වන දින “එයාර් සිලෝන්“ සමාගමට අයත් Hawker Siddeley HS 748 (registered 4R-ACJ) වර්ගයේ යානය බෝම්බ පිපුරුමකින් විනාශයට පත්විය. මෙම බෝම්බය එම යානයේ භාණ්ඩ බහාලන කුටියේ තිබූ අතර ගුවන් නියමුවන් විසින් යානය පියාසර කිරීමට පෙර සිදු කරනු ලබන පරීක්ෂණ සිදු කරන අතරතුර දී මෙම පිපිරීම සිදු වී ඇත.

මෙම ගුවන් යානය ශ්‍රී ලංකාවේ ගුවන් යානා ලියාපදිංචි ලේඛණයේ ලියාපදිංචි කර තිබුණේ 4R-ACJ අංකය යටතේ වන අතර ලාංකීය ඉතිහාසයේ බෝම්බයකට හසු වූ පළමු ගුවන් යානය එයයි.

මේ අතර 1978 වර්ෂයේ නොවැම්බර් මස 15 වන දින “අයිස්ලෑන්ඩික්“ ගුවන් සමාගමට අයත් අංක LL 001 දරණ “ඩී.සී. 8 “ වර්ගයේ යානයක් කටුනායක ගුවන් තොටුපලට ගොඩබෑමට උත්සහ කිරීමේ දී අනතුරට ලක් විය. මෙම ගුවන් යානය ඉන්දුනීසියාවේ “ගරුඩා“ ගුවන් සමාගම මගින් කුලී පදනම මත ලබා ගෙන තිබූ එකක් වූ අතර සවුදි අරාබියේ සිට ඉන්දුනීසියාව දක්වා මුස්ලිම් බැතිමතුන් ප්‍රවාහනය කරමින් තිබිණ. මෙම යානයේ මගීන් 249 ක් හා කාර්ය මණ්ඩලය 13 ක් සිටි අතර අනතුරින් කාර්ය මණ්ඩලය සහ මගීන් 183 ක් ජීවිතක්ෂයට පත් වූ අතර 79 දෙනෙකු දිවි ගලවා ගැනීමට සමත් විය. මෙම අවස්ථාවේ අධික වර්ෂාවක් ද දැඩි සුලං තත්වයක් තිබූ බව වාර්තා වේ. යානයේ ලියාපදිංචි අංකය TF-FLA වූ අතර Leifur Eiríksson ලෙස හඳුන්වනු ලැබිණ.

අනතුර සිදු වීමට පෙර මෙම යානයේ ඡායාරූපයක් පහත දැක්වේ.

තව කොටසක් බලාපොරොත්තු වන්න