ගුවන් මගීන්ගේ ගමන් මළු - Baggage and Hand Luggage

පසුගිය සිකුරාදා රාජකාරී කටයුත්තකට ගුවන් තොටුපලට ගිය අවස්ථාවේදී මට පොඩි Post ලියන්න අදහසක් ආවා. මා මාගේ කටයුතු වල නිරත වෙමින් සිටියේ මැදපෙරදිග බලා ගමන් ගන්නා ගුවන් යානයක් සම්බන්ධවයි. කියන්න ඕනෙ නැහැනෙ අනිවාර්යයයෙන් මෙහි මගීන්ගෙන් අතිමහත් බහුතරය මැද පෙරදිග බලා ගමන් ගන්නා ශ්‍රමිකයින්. ඔවුන් තම ඥාතීන්ගෙන් සමුගත්තේ ඉතාමත්ම දුකින්. තම අඹු දරුවන්ගෙන් වෙන් වූයේ හද සසල කරමින්.(අපිට මේක දැන් දැකලා පුරුදු වෙලා) හැබැයි මේ ගැන වෙනමම ලියන්න දේවලුත් තියෙනවා. මේවා කිය කියා ඉඳලා මම කියන්න හදන දේත් අමතක වෙනවා.

මගේ මීට පෙර Post එකෙත් කිව්වා ගුවන් මගීන්ගේ භාණ්ඩ ගෙන යාමට ඇති හැකියාව ගැන. සාමාන්‍යයෙන් එක් මගියෙක් සඳහා වර්ග දෙකක ගමන් මළු ගෙන යාමේ හැකියාව මගියාට ලැබෙනවා. ඒ ගුවන් යානයේ ගමන් මළු ගෙන යාම සඳහා වෙන් වන කොටසේ අසුරා ගෙන යන ගමන් මල්ල සහ අතේ ගෙන යා හැකි ගමන් මල්ල ලෙස.

ගුවන් යානයේ ගමන් මළු ගෙන යන කොටසේ යැවිය හැකි බෑගය (හෝ කීපය) පළමුවෙන්ම ගනිමු. මේ සඳහා සාමාන්‍යයෙන් නොමිලේ ගෙන යා හැකි ප්‍රමාණය ගුවන් සමාගමෙන් සමාගමට වෙනස් වෙනවා. උදාහරණයක් ලෙස දැක්වුව හොත් Qatar Airways වල එය කි.ග්‍රෑ. 20 ක් පමණ වන විට Air Arabia සමාගමේ ගුවන් යානයක එය කි.ග්‍රෑ. 30 ක් පමණ වෙනවා. නමුත් මේ ප්‍රමාණයත් මගියාගේ ස්වභාවය අනුව වෙනස් වෙනවා. දීර්ඝ කාලයක් සඳහා විදේශ ගත වන ශිෂ්‍යයෙක් නම් වඩා වැඩි ප්‍රමාණයක් ගෙන යාමේ හැකියාවක් තිබෙනවා. එසේ නැතිනම් වදේශයක පදිංචියට යන්නේ නම් ද වැඩි ප්‍රමාණයක් ගෙන යා හැකියි.

මෙම බෑගයේ ආරක්ෂක අංශ වලින් ඉඩ ලබා දෙන ඕනෑම දෙයක් ගෙන යා හැකියි. නමුත් මෙහිදී අන්තර්ජාතික ගුවන් සේවා සංවිධානය මගින් පනවා ඇති නීති රීති ද සැලකිල්ලට ගත යුතු වෙනවා. එම ආයතනය මගින් සමහර භාණ්ඩ ගෙන යාමත් සමහර භාණ්ඩ වලින් ගෙන යා හැකි ප්‍රමාණයනුත් සීමා කර තිබෙනවා. (ඒක වෙන දවසක ලියන්නම්) මෙම බෑගය සැකසීමේදී සැළකිය යුතු විශේෂ කරුණ වන්නේ එක් බෑගයක් 32kg වලට වඩා ඉක්ම නොවිය යුතුය. එයට හේතුව ජාත්‍යන්තර කම්කරු නීති වලට අනුව එක් කම්කරුවෙකුට එසවිය හැකි බර ප්‍රමාණය 32kg වලට සීමා කර තිබිමයි. ඒ අනුව යම් අයෙකුට 32kg වලට වඩා ගෙන යාමට අවශ්‍යය නම් එය කොටස් වලට වෙන් කර (32kg කොටස්) සකසා ගත යුතුය.

යම් අයෙකුට වැඩිපුර භාණ්ඩ ගෙන යාමට අවශ්‍ය නම් ඒ සදහා කිසිදු තහනමක් නැති මුත් ගුවන් සමාගමට ඒ සඳහා වීශාල මුදලක් ගෙවිය යුතු වෙනවා. මෙම මුදල් ප්‍රමාණය ගමනාන්තය සහ ගුවන් සමාගම අනුව වෙනස් වෙනවා. එම මුදල සමහර විට එක් කිලෝ ග්‍රෑමයක් සඳහා රු. 800/- සිට රු. 3000/- පමණ වෙනවා.

අතේ ගෙන යා හැකි ගමන් මල්ලේ උපරිම බර 7kg පමණයි. මෙම බෑගයේ ආහාර වර්ග ආදියත් තහනම් නොවන ගුවන් භාණ්ඩත් ගෙන යා හැකියි.

මා අත් දැක ඇති ‍දෙයක් තමයි බොහෝ මගීන් හැකි සෑම දෙයක්ම තමාගේ ගමන් මළු වලට ඔබාගෙන පැමිණීම. නමුත් අවාසනාව වන්නේ බොහෝ මගීන් මෙම භාණ්ඩ අවසානයේදී ගුවන් ‍තොටුපලේම හැර දමා යාමයි. එලෙසම ඔවුන් කාර්ය මණ්ඩලයට ද කරදර කරනවා තම බෑගය කෙසේ හෝ භාරගන්නනා ලෙසට. නමුත් ඔවුන්ට එසේ කළ නොහැකිය. නැතහොත් තමන් සමග ගමන් ගන්නා වෙනත් මගියෙකුට මෙම භාණ්ඩ ඔහුගේ පුමාණයට ඇතුලත් කිරීමට උත්සහ කරනවා. මෙය නම් යම් සධාරණ ක්‍රියාවක්. නමුත් එසේ භාණ්ඩ ලබා ගන්නා පුද්ගලයා ඒ පිළිබඳව සැලකිලිමත් විය යුතුය. මන්ද එය සමහර විට අනවශ්‍ය කරදරයක් විය හැකියි.

මෙසේ එක් මගියෙකුට ගෙන යා හැකි බර ප්‍රමාණය ටිකට් පතේ මුද්‍රණය කර තිබෙනවා. එය උදාහරණයක් ලෙස 20K හෝ 20kg ලෙස සටහන් වෙනවා. මේ සියළුම විස්තර ගුවන් ටිකට් පත ලබා ගන්නා නියෝජිත ආයනයෙන් ලබා ගත හැකියි.

ඒවගේම යම් බිඳෙන ‍සුළු දෙයක් ගෙන යාමට අවශ්‍ය නම් එය වෙනම අසුරා ගුවන් ටිකට් පත් පරීක්ෂා කරන නිලධාරීන්ට එය දැන්විය යුතුය. එවිට එය ඔවුන් බිඳෙන සුළු භාණ්ඩයක් ලෙසට සදහන් කර ගුවන් යානය වෙත යොමු කරනු ඇත.

තවද සෑම බෑගයකම වීවෘත කර හැකි ස්ථාන ඉබි යතුරු දමා ආරක්ෂා කර තිබීම සුදුසුය. තවත් අවශ්‍ය වන්නේ නම් මූළු බෑගයම සෙලේෆේන් වලින් ආවරණය කර ගත හැකිය. මේ සඳහා අවශ්‍ය පහසුකම් ගුවන් තොටුලළේ සපයා ඇති අතර එක් බෑගයක් සඳහා රු. 500/- ක් අයකෙ‍රේ.

තවත් දෙයක් සඳහන් කිරීමට අවශ්‍යයි. තමාට අතේ ගෙන යාමට ලැබෙන ගමන් මල්ලේ අත්‍යවශ්‍යම දෙයක් දමා ගන්න. මගේ පෞද්ගලික මතය නම් ඇඳුමකුත් එහි අඩංගු විය යුතු බවයි. මන්ද හදිසියේවත් විශාල ගමන් මල්ල අස්ථාන ගත වුවහොත් එය පිහිටක් වන බැවිනි.(හදිසියේවත් ගමන් මල්ල අස්ථාන ගත වුවහොත් එය වහාම අදාල ගුවන් සමාගමට දන්වන්න. එය සොයා දීමට ඔවුන් අපොහොසත් වුව හොත් ඒ සඳහා වන්දියක් ඔවුන් ගෙවාවි. එසේ ප්‍රතික්ෂේප කල හොත් ඒ බව ශ්‍රී ලංකා සිවිල් ගුවන් සේවා අධිකාරියේ ගුවන් ප්‍රවාහන සහ නීති කටයුතු අංශය‍ට ලිඛිතව දන්වන්න. 0112441522)

අවසාන කිරීමට පෙර එක් සිද්ධියක් ඔබට සදහන් කිරීමට කැමතියි. දිනක් මා සිටින අවස්ථාවක එක් මගියෙක් පැමිණි අතර ඔහුගේ ගමන් මල්ල අනුමත ප්‍රමානයට වඩා වැඩි විය. ඒ බැව් රාජකාරියේ සිටි නිලධාරිනිය පැවසූ විට ඔහු කිසිත් නොකියා පසෙකට ගොස් ගමන් මලලේ වූ ඇඳුම් එළියට ගෙන බර හරියන තුරු ඒවා ඇඟ ලා ගත්තේය. පසුව පැමිණි විට ඔහුගේ ගමන් ම‍ල්ලේ බර ප්‍රමාණය අවශ්‍ය ප්‍රමාණයට අඩු වී තිබිණ. එය අප කා හටත් විනෝදය ‍ගෙන දෙන්නක් විය.

කෙසේ වෙතත් අවසානයේ සඳහන් කළ යුත්තේ තමන්ට ගෙන හා හැකි බර ප්‍රමාණයත් ගෙන යා හැකි දේවලුත් පිළිබදව දැනුවත් වීම මගින් අනවශ්‍ය ප්‍රමාදයන් වලක්වා ගත හැකි බවයි.

6 comments:

  1. This comment has been removed by the author.

    ReplyDelete
  2. http://www.kedapatha.info/2009/02/blog-post_11.html

    ReplyDelete
  3. නියමයි. මාර විහිළුවග ඒ අගේම ගොඩක් දෙවල් ඔඹතුමාගෙන් දැන ගත්තා

    ReplyDelete
  4. ගුවන් සේවා සම්බන්ධයෙන් ඇති රැකියා අවස්ථා පිළිබදවත් අප දැණුවත් කරන්නේ නම් මැනවි. තවද හැදෑරිය යුතු පාඨමාලා මොනාද ඒ වගේ ගාස්තු කොහොමද අගේම ආර්ථික අපහසුතා ඇති මෙන්ම ඉංග්‍රීසි භාෂාව පිළිබදව ප්‍රවීනත්යෙන් මද අයට ඇති රැකියා අවස්ථා මොනාද පිළිබදව ත් ඔබට හැකි පමණින් අපව දැණුවත් කරන මෙන් ඉතාම කාරුණිකව ඉල්ලා සිටිමි. මොකද මෙවැනි ක්ෂේත්‍රයක් සම්බන්ධව විස්තර ලබාගැන්මට ඇති ඉඩ පුස්තාව හිග කමත් කඩුව නිසා ඇති බියත් නිසා ඔබ වැන්නෙක් මගින් ලබා ගන්නා මූලික දැණුමින් එම බිය හා සබකෝළය නැති වී මෙම ක්ෂේත්‍රය සම්බන්ධව දැණුමින් අපට පිරිපුන් විය හැකිය. දිගටම අප දැණුවත් කරන්නග අපි දිගටම කියවනවා. ඔබට ජය

    ReplyDelete
  5. කියෙව්වා. විස්තර වලට ස්තුතියි !

    ReplyDelete

මොනවා හරි ලියලා ගියොත් හැදෙන්න පුළුවන්....