අමාරුවෙන් බස්සන පාරෝ ගුවන් තොටුපල – Paro International Airport

හිමාල කඳුවැටිය පාමුල තිබෙන භූතානය ස්වභාවික සෞන්දර්යයෙන් අනූන ඒ වගේම පරිසර දූෂණයෙන් අවම වූ මනස්කාන්ත දේශයක්. ස්වභාවයෙන්ම කඳු වලින් ගහන වූ මේ රටේ සියල්ලන්ම බෞද්ධයින්. ඒ වගේම ඉතාම සාමකාමී රටක්. ප්‍රවාහන ක්ෂේත්‍රය ගත හොත් ඉතාමත්ම පහල මට්ටමක සංවර්ධනයක් තිබෙන මෙහි කඳු සහිත භු විෂමතාව හේතුවෙන් මාර්ග පද්ධතියක් සකස් කිරීමට ඉතා අපහසු තත්වයක් තිබේ. ඒ සඳහා අධික වියදමක් දැරීමට සිදුවේ. ප්‍රධාන ප්‍රවාහන මාධ්‍යන් අතරින් ගුවන් හා මාර්ග ප්‍රවාහන ය තිබුණත් දුම්රිය ප්‍රවාහනයක් ඇත්තේ නැහැ.

මම අද මේ භූතානය පිළිබඳ පිවිසුමක් ලබා ගත්තේ මේ දිනවල භූතානයේ අග්‍රාමාත්‍යවරයා ශ්‍රී ලංකාවේ සංචාරයක් කිරීමට සැළසුම් කර තිබෙන නිසා. එපමණක් නොව මේ දිනවල ලෝකයේ ගුවන් අනතුරු කිපයක්ම වාර්තා වුණා. එයත් එක් හේතුවක් අද ප්‍රධාන කාරණයට යොමු වීමට.
භූථානයේ කඳු සහිත භූ විෂමතාවය හා නිරන්තර වෙනස් වන කාළගුණය නිසා ගුවන් යානා ගොඩ බැස්සවීම ඉතාමත් අනතුරුදායකයි. ඒ සඳහා විශේෂ පුහුණුවක් නියමුවන්ට අවශ්‍ය වනවා. භුතානය සතුවන්නේ එකම එක ජාත්‍යන්තර ගුවන් තොටුපළක් පමණයි. එයට ද යානා ගොඩ බැස්සවීම ඉතාමත් අභියෝගාත්මකයි. 

අද අපි මේ භූතානයේ එකම එක ජාත්‍යන්තර ගුවන් තොටුපළ සම්බන්ධ විස්තර ටිකක් දැන ගනිමු. 

ගුවන් තොටුපළ පිහිටා තිබෙන්නේ භුතානයේ පාරෝ දිස්ත්‍රික්කයේ පාරෝ නිම්නයේ. මේ ගුවන් තොටුපල අසලින් “පාරෝ චූ“ ගංගාව ගලා බසින අතර වටපිටාව ඉතාමත් සුන්දරයි. ගුවන් තොටුපල මුහුදු මට්ටමේ සිට අඩි 7300 ක් පමණ ඉහළින් පිහිටා ඇති අතර ධාවන පථයේ දිග මීටර් 1985 ක් වේ. ඒ වගේම ගුවන් තොටුපලේ මෙහෙයුම් සිදු වන්නේ දිවා කාලයේ දී පමණයි.
ගුවන් තොටුපළ ආරම්භ වි තිබෙන්නේ 1968 දී පමණ වන අතර මුලින්ම එය භාවිතා කර ඇත්තේ ඉන්දියානු ගුවන් හමුදාව විසින්. පසු කාලීනව ගුවන් තොටුපළ සංවර්ධනය වූ අතර ධාවන පථයේ දිග අද තිබෙන ප්‍රමාණයට ගෙන ආවේ 1990 දී පමණය. 

ගුවන් තොටුපලේ මගී පර්යන්ත එකක් පමණක් ඇති අතර එය භුතානයේ පාරම්පරික කලාවන් පිලිඹිබු වන ආකාරයෙන් අලංකාරව සකසා තිබෙනවා. 

විශේෂයෙන් සඳුහන් කළ යුතුවන්නේ මෙම ගුවන් තොටුපළට ගුවන් යානා ගොඩ බැස්සවීම සඳහා සුදුසුකම් ලත් ගුවන් නියමුවන් සිටින්නේ ඉතාමත් අතලොස්සක් පමණයි. පසුගිය කාලයේ වාර්තා අනුව එසේ සුදුසුකම් ලත් නියමුවන් ගණන 8 ක් පමණ විය.

මෙම ගුවන් තොටුලේ ජාත්‍යන්තර මෙහෙයුම් සිදු කරනු ලබන්නේ භුතානයේ ජාතික ගුවන් සේවය වන “ඩෘක් එයාර්“ ගුවන් සමාගමයි. ඉන්දියාව, බංගලිදේශය, නේපාලය, තායිලන්තය හා සිංගප්පූරුව යන රටවලට මෙම ගුවන් තොටුපලේ සිට මෙහෙයුම් සිදු වේ. ඊට අමතරව දේශීය ගුවන් මෙහෙයුම් ද සිදුවේ.

මේ තියෙන්නෙ ගුවන් තොටුපලේ පර්යන්ත ගොඩනැගිල්ල

මේ තියෙන්නෙ ධාවන පථය

මෙතන ක්ලික් කරලා බලන්න මේ ගුවන් තොටුපලට ගුවන් යානයක් ගොඩ බැස්සවීමට දරණ උත්සාහය.

කුඩා ගුවන් යානා මෙහෙයුම් සිදු වන නිසාත් මෙහෙයුම් ප්‍රමාණය අඩු නිසාත් ගුවන් ටිකත් ලබා ආසන වෙන් කරවා ගැනීම කල් වේලා ඇතිව සිදු කළ යුතු වන අතර ඔබ භුතානයට යාමට සැළසුම් කරන්නේ නම් එයත් සිහිතබා ගත යුතුය.

14 comments:

  1. හම්මට උඩු, එතනට කඳු මැදින් යනකොටම බොක්ක කූල්වෙනවනෙ.

    අර ගඟ හැදිල තීන්නෙ පාරාවෝ චූ කුලද දන්නෙ නෑ..!

    ReplyDelete
    Replies
    1. අන්න ඒකනෙ ඉන්දික බස්සන්න අමාරුයි කියලා කිව්වෙ. දන්න අඳුනන දෙවියෙක් සිහි කරගෙන යන එකයි තියෙන්නෙ. ඔය අතරේ අර ජර්මන්වින්ග් එකේ වගේ පිස්සු පයිලට් කෙනෙක් හිටියොත් කොහොමද....?

      Delete
  2. හපොයි බං අන්තිමට වීඩියෝ දහයක් විතර බලල තමා ආවේ “මෙතන“ ක්ලික් කරල ඉවර වෙලා.. හැක්

    ReplyDelete
    Replies
    1. ඒකට තමා කුතුහලය කියන්නෙ. ඉතින් මේක කියවලා “මෙතන“ ක්ලික් කළාම කුතුහලය ඇති වෙනවා නම් ඉතින් ඔන්න මගේ වැඩේ හරි ගිහින්......

      Delete
  3. ඔයවගේ රනවේ එක මැද හරියෙ ලෑන්ඩ් කළොත් එහෙම පල්ලමකට වැටිල කෙලවරවෙන එයාපෝට් එකකුත් තියෙනව නේද ‍කොහේ හරි.

    ReplyDelete
    Replies
    1. ඔව් නේපාලයේ ලූක්ලා ගුවන් තොටුපල
      මෙන්න බලන්න
      https://www.youtube.com/watch?feature=player_detailpage&v=EfAw8ulhTiQ

      Delete
  4. හරිම ලස්සන පරිසරයක්.වීඩියෝ එක බලනකොට දැනෙන්නෙ අපිත් ඒකෙ ඉන්නව වගේ .මෙතන අනතුරු සිදුවෙලා නැද්ද?

    ReplyDelete
    Replies
    1. ඇත්තටම ගිම්හානි භූතානය කියන්නෙ ලස්සන රටක්. රටෙන් 75% ක් තියෙන්නෙ වනාන්තර.
      දැනට තියෙන තොරතුරු අනුව නම් කිසිම ගුවන් අනතුරක් වාර්තා වෙලා නැහැ. මේ ගුවන් තොටුපලෙන් පිටවුන හෝ මේ ගුවන් තොටුපලට ගොඩබෑම අරමුණු කර ගනිමින් ගුවන් ගත වූ යානයක් හෝ අනතුරට ලක් වෙලා නැහැ කියලා තමයි තොරතුරු තියෙන්නෙ. මේකට එක හේතු වශයෙන් කියන්න පුළුවන් අනතුරුදායක බව ඉහළ නිසා ඉතාම් පරිස්සමින් මෙහෙයුම් සිදු කිරීම සහ ගුවන් මෙහෙයුම් ගණන අඩු වීම.

      Delete
  5. අපේ අහසටත් වසන්තය ඇවිල්ලා. සිත් ගන්නා සුලු විස්තරයක්. වීඩියෝ ටික මහගෙදර ගිහිල්ලාම බලනවා. එහෙ wifi කලාපේනේ....

    මම දන්න හැටියට එහේ ජාතික රූපවාහිනී සේවයක් එහෙමත් නෑ. රජයේ පාසල් වලත් හෙන අවුල්.

    ඉෂාර මහත්මයට බොහොම ස්තූතියි.

    ReplyDelete
    Replies
    1. ඔව් බුද්ධි වසන්තය ආවා කියලා දැන ගන්න පුළුවන් එක දෙයක් තමයි අපිට ඉහළින් තියෙන අහස. පැහැදිලි නිල්වන් අහස.

      Delete
  6. අමාරුදත් අහනවා. යමක් අනතුරුදායක නිසාම වැඩි ප්‍රවේශමෙන් කරනකොට අනතුරක් වෙන්න ඇති අවස්තාව අඩු වෙනවා කියන එක තමයි හිතා ගන්න පුලුවන්. ඇයි අර ගොං නාම්බෝ දෙන්නෙක් ලැප්ටොප් දිහා බලාගෙන එයාපෝර්ට් එක පහු කරලා ගිහින් තිබ්බේ

    ඉශාර, මට පොඩි ප්‍රශ්ණයක් තියෙනවා ක‍ටුනායක බැගේජ් හැන්ඩ්ලිං ගැන. ඒක ඔයාට අදාල නැද්ද?

    ReplyDelete
    Replies
    1. ලොක්කෝ, පොඩි හරි ලොකු හරි අවුලක් නෑ. කියන්න. පුළුවන් දෙයක් නම් කරලා දෙන්නම්. නැත්තම් කර ගන්න විධිය හරි කියලා දෙන්නම්. මගේ ඊමේල් එක ඇති නෙ. විස්තරේ කියන්න.,

      Delete
    2. ඊ මේල් කරන්නත් පුළුවන්. මෙහෙම කියන්නත් පුළුවන්. මේකයි ඉෂාර. මේක මගේ පෞද්ගලික ප්‍රශ්ණයක් නෙවෙයි. නමුත් අපි ගෙදර එන ගානේ ක‍ටුනායකදි අපේ බෑග් වලට මොකක් හරි හානියක් වෙනවා. එක්කෝ ඉබ්බෝ කඩලා. නැතිනම් සිප් කඩලා ඇරලා බලලා. අපි එහෙම හොරකම් කරයි කියලා හිතෙන දේවල් ඔය ලොකු බෑග් වල දාන්නෙත් නෑ. ඒත් මේක හැම පාරම වෙනවා. මම මේ ගැන අහලා බැලුවාම මේක හුඟ දෙනෙකුට වෙනවා නමුත් කතාකරලා වැඩක් නැති හන්දා නිකං ඉන්නවලු.

      අනික බෑග් හැඬ්ල් කරන්නේ කුණු මාලු ගානට. උස්සලා අතෑරපු බව හොඳින් පේනවා.

      මේකට විසඳුමක් තමයි. ඔය අපිට නොපෙනෙන පැත්තේ බෑග් හැඬ්ල් කරන ඒවා කෙරෙන හැටි කැමරා පද්ධතියකින් නිරීක්ෂනය කිරීම. මේක මහ අමාරු වැඩක් නෙවෙයිනේ ජාත්‍යන්තර ගුවන් තො‍ටුපොළකට. මට මේ ඇර වෙන විසඳුමක් හොයාගන්න අමාරුයි. මේක ප්ලේන් එකේ කාගෝ බේ එකේ කෙරෙනවා වෙන්න බෑ. නමුත් හදිසියෙන් කරපු බව පේනවා

      Delete
    3. Dude, මේක ඔයා කිව්වා වගේ හැම ගුවන් සමාගමකම තියෙනවා. ගමන් මළු හැසිරවීම බොහෝ දුරට අපරික්ෂාකාරියි. ඒ වගේම සමහර ස්ථාන වල හොරකම් කිරීම් සිදු වීමත් දකින්න ලැබෙනවා. කොහොම වුණත් මේ හැම දෙයක්ම වැරදි වැඩ.
      මේකට එක විසඳුමක් තමයි බෑග් එක භාර දෙන විට වටිනා කියන දේවල් ගැන පුකාශයක් කරමින් භාර දීම. එවිට නැති වුනොත් ඒ වන්දි ලබා ගැනීමට හැකියි.
      මේ මොන තත්වයක් වුණත් ගුවන් සමාගමට පැමිණිලි කර වන්දි ලබා ගැනීමට හැකියාව තිබෙනවා. එහෙන් පැහැදිලි පිළිතුරක් නැති නම් අපිට පුළුවන් සිවිල් ගුවන් සේවා අධිකාරියට පැමිණිලි කරන්න.
      අපේ සිවිල් ගුවන් සේවා අධිකාරියත් පාරිභෝගික සේවා අධිකාරියත් එකතු වෙලා මේ පැමිණිලි විභාග කරලා විසඳුම් ලබා දෙනවා.
      වෙනත් රටවල් වලත් මේ විධියටම කරන්න පුළුවන්.
      තව විස්තර ඕනෙ නම් අපිට කථා කරන්න.

      Delete

මොනවා හරි ලියලා ගියොත් හැදෙන්න පුළුවන්....